轉型與蛻變中

鄭中基

陳嘉上導演說，香港唔夠喜劇演員。冇錯，現時鄭中基，已為了港產喜劇片的唯一最生招牌。即使這次《三分鐘先生》中嘗試轉型，但大家唔駛擔心，佢唔係要洗底，而係想擴闊自己的才能。
當年的周星馳，也是如此。 

陳嘉上導演說，香港唔夠喜劇演員。
冇錯，現時鄭中基，已為了港產喜劇片的唯一最生招牌。
即使這次《3分鐘先生》中嘗試轉型，但大家唔駛擔心，
佢唔係要洗底，而係擴闊自己的才能。
當年的周星馳，也是如此。
遲下他更要當導演，陳嘉上說﹕「對他來講這只是個開始。」
這意味著佢有很大的隱藏潛力?
陳嘉上導演覺得你的性格很適合此角色，你認為他所講的是哪一方面?

我性格很急，同時又好樂天，平時做都希望快快手手，有時在片場見到Gordan(陳嘉上)停係度諗緊，我會走過去，問佢搞咩呀咁，好似係度催佢。於是我諗我的真實性格同片中角色有好似的地方，乜都要三分鐘之內解決，無論開會、簽Contract及湊仔都一樣。另一方面我又未婚亦冇仔女，係這花樣年華之齡突然有個細路出現在我面前，我同樣都會束手無策，所以Gordan認為只要依照我自己的真實反應去演此角色，就應該可以達到預期的效果了。

你今次的戲份會嘗試有認真一點的內心戲，你感到壓力大嗎?

其實突然轉了少少演繹方法，我自己有擔心過的，驚一時間掌握唔來。我問Gordan應該點樣做，佢就會叫我想像一一個正常生活的人係點樣就可以了，其實係有點虛，可謂正常其實我都唔肯定，有時我諗可能自己都諗得太多，Gordan反而好似諗得比較少，佢睇有時都可簡單，就好似愛因斯坦咁，將問題盡量睇得簡單直接一點，老實講我唔明愛因斯坦的意思，但時間長了我大概都明白Gordan的意思，要突然搞笑就搞笑，要認真就認真，唔需要夾硬去迫自己，自然流露出來就可以了。

今次亦係你首次同小朋友有極多的對手戲，你覺得同小朋友合作難嗎?

未合作前，我以為小演員最初都是會同對手慢熱，熟了之後就會同你玩唔停，但原來又唔係咁的，區家興小朋友原來專業到不得了，佢兩歲開始就有演戲，經驗豐富，有一次未埋位的時候，我同佢都瞌眼，我叫佢不如一陣覺吧，佢竟然答『都未收工乜呀』咁，我就答﹕『咁你唔就我先啦...』。佢的表現令我非常surprise，令我對小演員的觀感改變。

早前有傳你因為對片中的劇情有意見，令拍攝進度一度停止，實情係點?

事實並非外界講得咁嚴重，當時戲拍了三日，大家都覺得好似拍出來的東西唔太似原先想要的東西，當中當然包括監製在內。因此去到一個Moment大家必須先停工，然後坐下來開會，睇個故事應該點去。其實這次拍攝過程中，一直都係有改動的，有時聽人講點解以前的戲會咁有活力咁好睇，我相信可能係因為大家一邊度一邊拍有關，當幾個編劇都係片場，大家都不斷有唔同的嘗試時，其實係可以擦出意想唔到既火花的。我自己雖然冇參與創作，不過某些場口、或對白，導演會問我在不同的situtaion會想點演，於是我又可以加入我自己的東西，我覺得咁樣的合作方式好愉快。

片中的末段，故事發展會比較沉重，你覺得日後自己可以在類似的演繹上有更多嘗試嗎?

我的角色係笑住面對一件慘事，始終算係比較新的嘗試，我同導演、編劇，都唔係百分百sure咁樣一定會work，但我覺得係一個值得嘗試的挑戰，由鄭中基去演一個充實一點又有意義的故事，究竟會係點，我覺得大家都會好奇既。當然，我今次並非一百八十度的轉變，我自己擔心如果轉得太多會『捉蟲』，今次觀眾可以接受到的話，我相信下次有機會，就可以再去多少少。

你正籌備做導演拍片，現階段進展如何，第一次當導演緊張嗎?

準備得如火如荼，會在農曆年賀歲檔期上畫，係一部家庭式溫馨喜劇片，有親情、愛情、神仙等元素。我現在最擔心的主要是如何帶演員入戲，我始終算係新手，有技巧係要摸過先知，好彩參演的演員都好有經驗，好似毛毛(毛舜筠)、達明(張達明)、蘇玉華等，我諗有佢地的質素，我可以放心少少既。

鄭中基 Filmology
2000《12夜》
2001《月滿抱西環》、《不死情謎》、《愛君如夢》
2002《互動殺人事件》、《我愛一碌葛》、《我老婆唔夠秤》
2003《行運超人》、《龍咁威2003》、《金雞2》
2004《我要做Model》、《追擊8月15》
2005《喜馬拉亞星》、《龍咁威2之皇母娘娘呢？》
2006《至尊無賴》、《黑拳》、《3分鐘先生》